Tuesday, 18. August 2009 05:43 PM -0400

I. Kipawlna Min                

Kipawlna min pen “Zomi Innkuan Washington D.C”, atom in “Zomi D.C” kici ding hi.

 II. Phualpi

Phualpi pen Washinton D.C, Maryland leh Virginia state sungah hi ding hi. Tulai takin kipawlna zum pen Pa Thang Lian Pau(Zotaang) inn kizang phot ding hi.

 III. Kipawlna gam huam

Kipawlna gam huam pen state “3” a hi Washinton D.C, Maryland, Virginia te kihel ding hi.

 IV. Pawlpi Ngimna leh     IV. Tupna Bulpite

1. I minam min “Zomi” thupi sakin pahtawi ding

2. Zongeina, Zopau, Zolai kemcing in thupi sak ding

3. Pawl tuamtuam, nam tuamtuam cih kikhen loin Zomi sungah pumkhat suak a, nasepkhop theih nading

4. Nopna Dahna ah kiuap, kikhual ding

5. U.S.A leh leitung gambup Zomi innkuan tuamtuamte tawh kizom in, i minam leh i Zogam, Pasian gam khantoh nading semkhawm ding.

6. I gam i minam a puah ding Zomi siamsin khangsawnte pantah in huh theih nading

 V. Thu meilet te (Policies)

1. Hih kipawlna in biakna pawlpi  leh (nai-ngan-zi) political party kipawlna hi lo a, minam kipawlna hi ding hi.

2. Hih kipawlna in D.C area sung  aom Zomite nopna leh dahna ah a makaih ding kipawlna hi ding hi.

3. Kipawlna sungah aituam vai kilutpih thei loin mipite leh minam ading sepkhiatna hi ding hi.

 VI. Kipawlna thu bulphuh

            Kipawlna ii thu bulphuh pen “ Zomi sungah innkuan khat i hi hi” cih hi dinga, Lai siangtho bulphuh pen Late 33:12 “Topa pen Pasian a, a nei.. minam in thupha ngah minam a hi hi” cih hi ding hi.

 VII. Kipawlna makai dingte

            Kipawlna makai (Executive Committee) te pen D.C area sung ah  a tawm pen kum nih aom khinsate hi ding hi. Makai dingte pen Legal Status a nei te hi ding hi.

 VIII. Kipawlna ii ciaptehna lim(Emblem)

            Kipawlna ii ciaptehna lim pen Vaphual nih kilutuah in a tungah “Zomi Innkuan Washing D.C” leh a nuai ah “USA” cih kingelh ding hi.

 IX. Kipawlna makaipite (Executive Committee)

A. Thu vanpite

**Thu dotpi (Patrons)  - Zomi Innkuan D.C sung aa, koih ding a kilawm Upate

1. Pawl Lutaang(Chairman)                             - 1

2. Pawl lutang huh(Vice Chairman)                   - 1

3. Thu zeekpi (Secretary)                                - 1

4. Thu zeekpi huh (Asst. Secretary)                  - 1

5. Sum keem (Treasurer)                                - 1

6. Saziansit (Auditor)                                      - 2

 B. Committee makaite

1. Biakna lam makaite (Religious Leaders)       - Biakna lam makai dingte pen Biakna lam aa, na a sem ngei te kikoih ding hi.

2. Lailam makaite (Editors)                              - Lai lam a uk, a sem nuam 2 kikoih ding hi.         

3. Ngeina lam makaite (Cultural leaders)   - 2 kikoih ding hi.

4. Music Makaite                                     - 2 kikoih ding hi.

5. khantoh lam makai (Business Leaders) - 2 kikoih ding hi.

6. Kimawlna lam makai (Sports)               - 2 kikoih ding hi.

7. Nasep silbawl makaite                          - 2 kikoih ding hi.

8. Veng Hausa (Area Leaders)

* Veng Hausa a tawm pen 1 a tam pen 3 ciang kikoih thei ding hi.

1. Frederick Veng      

2. P.G leh Montgomery County Veng

3. Virginia Veng

4. Laurel Veng

5. Baltimore Veng

X. Kipawlna makaipite nasep dingte (Duties)

1. Pawl lutang (Chairman)

1. Kipawlna i lutaangpi hi ding a, vaihawmna teng ah makaipi sem in meeting sam thei ding hi.

2. Pawl tawh kisai a sia a pha bawlna khempeuh theihpih  dinga kikhopna (meeting) ah makai in vaihawmna tuamtuamte ah Upa khat hi ding hi.

3. Kipawlna thu vaihawmna leh thu khensatnate ah Thuzeekpi tawh min thuh khawm ding hi.

4. Kipawlna nasep a panpih zo den leh pawl ading, adiing ngam, a sem ngam khat hi ding hi.

2. Pawl lutaanghuh (Vice – Chairman)

1. Pawl lutaang ii nasepna panpih in, Pawl lutaang aom loh ciang leh a man loh ciangin Pawl lutaang ii tavuan teng len ding hi.

 3. Thu zeekpi (Secretary)

1. Thu zeekpi in pawl sung nasepna Tanupi sem ding hi.

2. Kipawlna makaite thukimna tawh meeting sam dinga,   hun  uk sem in, thu khensatnate ciamteh in, sem in van pah ding hi.

3. Pawl nasepnate van zeel in pawldangte tawh kizopna, pawl khantoh nading a sempi pen hi ding hi.

4. Kipawlna nasepnate ah Pawl lutang tawh min thuh khawm dinga, thu kizaksakna, sapna leh lai tuamtuam te gel in hawmkhia ding hi.

4. Thu zeekpi huh (Asst. Secretary)

1. Thu zeekpi ii nasepna huh in seppih ding a, Thu zeekpi aom loh ciang thu zeekpi panmunlen ding hi.

5. Treasurer (sum kem)

1. Kipawlna sumte kem in sazian tawh koih ding hi.

2. Kipawlna sumte kipawlna makaite theih loh lungkim loh in zang thei lo, pia thei lo ding hi.

3. Kipawlna sum te a kisapna aom leh a mahmah in loh kik ding hi.

6. Sazinsit te (Auditors)

1. Kipawlna sumte a kisam bangbang sit thei ding hi.

2. Pawl vante a kim leh a kim lo sazian sit den ding hi.

3. Sazinsit in sumkem ii sum zatna pen pawl ii deihna tawh a kituak leh a kituak lo zong en ding a, sum sazian tungtawn in lungkim lohna aom leh Pawl lutang leh Thu zeekpi te tungtawn in meeting sam ding hi.

              Committee makaite

1. Biakna lam makaite (Religious Leaders)

1. Kipawlna kha sim kikhopnate ah makai sem ding uh hi.

2. Biakna lam ah a sem lai, a sem ngaite hi ding hi.

3. Kipawlna makai thu kikupna meeting ah kah thei ding hi.

2. Lailam makaite (Editors)                               -

1. Kipawlna min tawh a kihawmkhia thu kizaksakna leh laibu bawlnate ah Editor sem in makai ding hi.          

2. Zolai a khantoh nang makai in sem ding hi.

3. Kipawlna makai thu kikupna meeting ah kah thei ding hi.

3. Ngeina lam makaite (Cultural leaders)

1. A kisambang a Zongeina lam lahna, lamsinnate ah makai sem ding hi.

2. Zogneina a tuamtuamte a manthan loh nading makai in kemcing ding hi.

3. Pawl khat leh pawl khat kilawmtatna aom ciang makai sem ding hi.

4. Kipawlna makai thu kikupna meeting ah kah thei ding hi.

 4. Music Makaite

1. Kipawlna tawh kisai la sinna aom ciang makai sem ding hi.

2. Kipawlna ii kikhopna ah la lam hong makaih ding hi.

3. Kipawlna ii Music tawh a kisai vante kemcing ding hi.

4. Kipawlna makai thu kikupna meeting ah kah thei ding hi.

5. Khantoh lam makai (Business Leaders)        

1. Kipawlna tawh kisai khantohna a tuamtuamte ah makai sem ding hi.

2. Kipawlna ii Business lam ah makai hong sem ding uh hi.

3. Kipawlna makai thu kikupna meeting ah kah thei ding hi.

 6. Kimawlna lam makai (Sports)                      

1. Kipawlna tawh kisai kimawlna atuamtuamte leh pinic te ah makai sem ding hi.

2. Kipawlna makai thu kikupna meeting ah kah thei ding hi.

7. Nasep silbawl makaite                                 

1. Kipawlna min tawh a kibawl puai, kikhopna leh kimawlna te ah nasep silbawlna lam makai sem ding uh hi.

2. Kipawlna makai thu kikupna meeting ah kah thei ding hi.

8. Veng Hausa (Area Leaders)

1. Veng Hausa te in a veng ciat ah makai hi ding a, veng sunga om member pih te dahna, nopna theihpih in panpih den ding hi.

2. Kipawlna pawl lutna leh kum sim sum (annual fee) te a veng ciat ah khuan den ding a, sum donna, laihawmna, thu zaksakna a tuamtuamte a om ciang a veng ciat ah tavuan la ding hi.

3. Kipawlna makai thu kikupna meeting ah kah thei ding hi.

 XI. Kitelna

1. Kitelna pen kumnih ciang khatvei ta kinei ding hi.

2. Kum nih pen term khat in kikoih ding a, makai khat in panmun len khat ah a kizom in term nih ciang bek sem thei ding hi. A hih hangin panmunlen dangte ah kitel thei ding hi.

3. Kitelna ah Zomi Innkuan D.C member hong lut teng in mee (Vote) pia thei ding hi. Member sung pan kum 18 pan a tungsiah ten bek mee pia thei ding hi. Member hong lut lo peuh mah in Kiteelna ah Mee khia thei lo ding hi.

4. Makai khat D.C area sung pan a paikhia or panmunlen pan a tawp aom leh Thuvanpite a tamzaw thukimna tawh panmun kibehlap thei ding hi.

XII. Thu vailawmna

1. Thu meilet (By-laws) tawh a kizui in Kipawlna maikai (E.C) a tamzaw thukimna tawh vai kihawm ding hi.

2. Thu meilet (By-laws) sungaa kihel lo thu dangdangte vaihawmna ah mipi a tamzaw thukimna tawh thu kikhensat ding hi.

XIII. Pawlmi suahna (Membership) 

1. Membership fee pen kum khat ciang khat veita kikhuan dinga, kum khat ai ding pen Family khat $ 50 pan a tungsiah, single khat $ 30 pan a tungsiah hi ding hi.

2. Hih membership fee leh Annual fee pen a hun zui in Kipawlna makaite thu khensatna tawh kikhan thei kilaih thei ding hi.

3. D.C Area sung hi lo, mun dang pan pawl a lut nuam te aom leh kisang ding a, nopna dahna tawh kisai benefit pen member dangte tawh kibangin kikhak ding hi.

4. Membership hong lut te bek in pawlpi ii hamphatna (Benefits) teng ngah ding hi. Member hong lut lo te in dahna a tuah uh ciang kitukpih dinga, siatvatna sum kipia lo ding hi.

XIV . Sum vai (Finance)

A. Sum ngah nading

1. Pawl mi suahna (membership fee) leh kum sim sum (Annual fee)

2. Zomi D.C min tawh kha sim kikhopna pan sumpi donna

3. Fund zonna a tuamtuam sum

4. Huhna leh piak khiatna a tuamtuam pan sum

B. Sum zatkhiatna

Kipawlna sum pen Kipawlna ii vaihawmna thu leh la te leh Membership hong lut pawlmi te tung bek ah kizangkhia thei ding hi.

1. Siatvehna

1. Zomi Innkuan D.C member khat peuh peuh in hong nutsiat leh fund sung pan $ 1,000 tawh kihuh ding hi.

2. Member te ii immediate family (Nu leh Pa, Ta te, Zi leh Pasal taktak) te in hong nutsiat leh $ 100 tawh kisiatveh dingin kikhensat hi.

2. Ki-uapna tuam tuam 

1. Kum khat ciang khat veita a kibawl Khaudo ni ta ciang Siamsin sungah a pahtawi huaite pahtawina letsong piakna kinei ding hi.

2. Kipawlna tawh kisai sum zat khiatna ah $ 50 a nuai siah ahih leh Sum kem te in Chairman leh Secretary te tawh kikum in sum kizang thei a, a hi zongin $ 50 a tungsiah a hih leh Kipawlna makai (E.C) a tamzaw thu kimna tawh bek sum kizang khia thei ding hi.

3. Kipawlna member hong lut te sungah Mopawi a om leh Kipawlna in hih theihzah in kipanpih ding a, huhna sum $ 100 tawh kipanpih ding hi.

XV. Kum khat sung kalsuanzia

1. January kha ni 1 ni kumthak muakna pen Zomi Innkuan D.C makaihna tawh kibawl den ding hi.

2. Febuary kha 20 ni Zomi namni ciangin Zomi(Chin)bup tawh kibawlkhawm dinga, Zomi Innkuan D.C pan Ngeinalam tuamtuam leh Lasakna, nasepsilbawlna atuamtuam ah kihel ding hi.

3. Octorber/November kha  Zongeina Khuadopawi pen Zomi Innkuan D.C makaihna tawh kum sim kibawl den ding hi.

4. Lai lam makaite a vaihawm zawh uh leh kum khat atawm pen nih vei “Zomi Innkuan D.C Newsletter” kihawmkhia ding hi.

5. Kikhopna pen kha khat ciang khatvei ta kinei dingaa, khabei ii Ninoni(Saturday) ta in kinei ding hi. A veng a veng in kikhop khasim kilaih ding hi. Kum kipat ta ciangin, kum khat sung kha sim kikhop ding Amun, A ni leh Hun uk, Hun zang dingte sehna kinei ding hi.

6. Thupha sanna, Lungdam kokna, Innthak muakna, dahpihna aom khak leh a kisehsa innteekte tawh kikum in, thukimna tawh kikhopna kilaih  thei ding hi.

XVI. Zomi Innkuan D.C suahni leh Kum Cin kikhop

Zomi Innkuan D.C suah ni leh hong piankhiat ni pen November 22, 2001 ni hi a, kum cin kikhop pen Zongeina Khuadopawi tawh kum sim kibawlkhawm den ding hi. 

XVII. Kipsakni

            Hih Zomi Innkuan D.C ii  Constitution leh By-law pen June 25, 2005 ni Zomi Innkuan D.C kikhopna ah mipi mai ah kisimkhia in mipite thu kimna tawh kikipsak hi. 

XVIII. Khelkikna leh Behlapna

Hih Zomi Innkuan D.C Constitution leh By-law pen  kipawlna member Mipi a tamzawte thukimna tawh a hun zui in kipuahpha thei kibehlap thei ding hi.

**Hih  Bylaw pen Tg. Dong Khan Khup leh Tg. Thomas On Sian Mungte in a ham (Draft) hong gelkhia uh a, mipite thu kikupna, puah kikna leh khensatna tawh June 25, 2005 in kikip sak hi.

Amendments I  (June 27, 2007)

1. Membership hong lut te bek in pawlpi ii hamphatna (Benefits) teng ngah ding hi. Member hong lut lo te in dahna a tuah uh ciang kitukpih dinga, siatvatna sum kipia lo ding hi.

2. Member te sung pan immediate family (Nu leh Pa, Ta te, Zi leh Pasal taktak) te in hong nutsiat leh $ 100 tawh kisiatveh dingin kikhensat hi. June 24 cianga hong nusia a nuai aa Zomi D.C member te ii innkuanpih te pen siatvehna kipia lai dingin kikhensat hi.

3. Membership fee pen kum khat ciang khat veita kikhuan dinga, kum khat ai ding pen Family khat $ 50 pan a tungsiah, single khat $ 30 pan a tungsiah dingin kihensat hi.

4. Zomi D.C Bylaw sunga member sung pan nau suak te $ 50 ta tawh pahtawina piak ding thu khunna pen khol (phiat) dingin kithukim hi.

Copy Right  ® 2005-2007 All rights reserved
Published by Zomi Innkuan Washington D.C, USA

webmaster@zomidc.org